رووماڵی هەواڵی رێککەوتنی نێوان هەرێم و عێراق لە ماڵپەڕی کەناڵە ئاسمانییە عێراقییەکاندا ماڵپەڕەکانی (Kurdistan24 و العراقية الإخبارية) بە نموونە
الكلمات المفتاحية:
رووماڵکردنی میدیایی، هەواڵی سیاسی، ماڵپەڕی هەواڵیی، رێککەوتنی هەرێم و بەغداالملخص
ئامانجی ئەم توێژینەوەیە بەمەبەستی هەڵسەنگاندن و شیکاریکردنە لە رووماڵکردنی هەواڵی رێککەوتنی نێوان هەرێم و عێراق لەساڵی ٢٠٢٣دا، وەکو پرسێکی سیاسی لە ماڵپەڕی هەردوو کەناڵی ئاسمانیی (Kurdistan24)ی کوردی و (العراقية الإخبارية)ی عەرەبی، كە تیایدا لەچوارچێوەی جۆری توێژینەوە وەسفییەکاندا، میتۆدی رووپێوی ناوەڕۆک و بە بەکارهێنانی ئامرازی فۆرمی شیكردنەوەی ناوەڕۆك جێبەجێکراوە، بۆ زانیینی ناوەڕۆكی ئەو پەیامە میدیاییانەی كە لە ژانری هەواڵدا ئەو پرسەیان خستۆتەڕوو. ئەویش لە رێگەی وەرگرتنی سامپڵێكی ناهەڕەمەکی مەبەستدار لە تەواوی هەواڵە سیاسییە بڵاوکراوەکانی ماڵپەڕی هەردوو کەناڵەکە لە مانگی نیسانی ساڵی ٢٠٢٣دا کە ژمارەکەی بریتییە لە (١٧١) هەواڵی پەیوەست بەو رێککەوتنە. لەو سۆنگەیەوە توێژینەوەكە گەیشتۆتە كۆمەڵێك دەرئەنجام لەوانە: هەردوو ماڵپەڕەکە جیاوازن لە رووماڵکردنی پرسی رێککەوتنی نێوان هەرێم و عێراقدا و بەشێوەیەکی بنکۆڵکاریی و قووڵ رووماڵی رووداوە سیاسییە گرنگەکان ناکەن و تەنیا بە رووکەشی پەی بە پرسەکان دەبەن، بەشێوەیەک ماڵپەڕی کەناڵە کوردییەکە ناوەڕۆکی رێککەوتنەکەی بە بابەتی بودجە و مووچە و ناردنی شایستە داراییەکانی هەرێم ئەبەستێتەوە، بە پێچەوانەوە ماڵپەڕی کەناڵە عێراقییەکە ئامانجی رێککەوتنەکە بە رادەستکردنی نەوتی هەرێم بە ناوەند چڕ ئەکاتەوە، هاوکات ماڵپەڕی هەردوو کەناڵەکە لە گەیاندنی وردەکاریی زانیاریییەکانی نێو رێککەوتنەکەدا، بایەخێکی زۆر بە جۆری رووماڵکردنی بەدواداچوون و ئاوێتە ئەدەن، لەلایەکی ترەوە هەردوو ماڵپەڕەکە سوودیان لە کەرەستە میدیاییە نوێیەکانی وەک (گرافیک و ڤیدیۆ و فۆتۆ ئەلبوم) نەبینیوە، لە رووماڵکردنی هەواڵی رێککەوتنی نێوان هەرێم و عێراق دا.
